Stormurinn í desember 2006

Ég bý svo vel að vinna hjá stjörnufræðingunum hér í háskólanum og má því til með að koma á framfæri línuriti af segulstorminum í desember 2006. Gunnlaugur Björnsson, stjarneðlisfræðingur, segulmælingamaður og yfirmaður minn, sendi mér línuritin í gær:

Hér undir er fyrst línuritið frá 14. desember 2006:

Og svo frá 15. desember:

Skoðum þá næst uppsprettu þessa segulstorms. Hér sést hvernig sólin leit út þann 13. desember:

Sólblossinn sem olli segulstorminum í desember 2006 mátti rekja til sólblettsins sem sést á myndinni hér fyrir ofan. Þessi blettur er á að giska tífalt stærri en jörðin að þvermáli. Sólbletturinn er virkt svæði á sólinni. Þar var segulsviðið sérstaklega sterkt og þegar orka þess losnaði úr læðingi varð þessi sólblossi til þann 13. desember:

Þetta er X3-blossi. Hann var miklu öflugri en sá sem olli nýliðnum segulstormi sem var C3-blossi. Útskýring á styrkleika blossanna er hér.

Næturnar á eftir prýddu falleg norðurljós himininn. Áreiðanlega eiga einhverjir íslenskir ljósmyndarar myndir af þeim. Gaman væri ef einhver fyndi þær í sínum fórum og deildi með okkur.

Já, stjarnan okkar er fjári mögnuð!

Minni svo í lokin á fyrri bloggfærslu um þá staðreynd að Mars verður EKKI jafn stór tunglinu í ágúst.

- Sævar

Stærsti segulstormur frá 2006

Athugasemdir

[Tryggvi (IP-tala skráð) 5.8.2010 kl. 16:06]

Það væri gaman ef það væri útskýrt hvað gröfin þýða. Það er engin texti á y ásum þeirra.

Ég geri mér þó í hugarlund að neðsta grafið tákni stefnu á segulcompas.

[Stjörnufræðivefurinn (www.stjornufraedi.is), 5.8.2010 kl. 16:10]

Það er rétt að það mætti koma fram. Efsta línuritið (Z) sýnir styrkleika segulsviðs jarðar í lóðrétta stefnu en næsta línurit á eftir (H) styrkleika sviðsins í lárétta stefnu (í nanótesla). Neðsta línuritið sýnir áttavitastefnuna (í gráðum). Tekið nánst beint af vefsíðu segulmælingastöðvarinnar.

[Stjörnufræðivefurinn (www.stjornufraedi.is), 5.8.2010 kl. 16:11]

Y-ásinn er tími sólarhringsins.