Stjörnufræðivefurinn færir út kvíarnar

Í sumar höfum við unnið hörðum höndum að nýjum Stjörnufræðivef. Hann verður opnaður snemma í september og er algjör bylting frá því sem fyrir er. Við hlökkum mikið til að kynna hann.

Það er okkur aftur sönn ánægja að kynna einn anga af nýja vefnum núna strax. Við höfum nefnilega tekið upp samstarf við ESO, stjörnustöð Evrópulanda á suðurhveli, sem starfrækir marga stærstu og afkastamestu stjörnusjónauka heims, meðal annars Very Large Telescope sem eru fullkomnustu sjónaukar á jörðinni í dag. 

Nú er til íslenskur ESO vefur og gegnir undirritaður hlutverki tengiliðs Íslands við ESO. Það þýðir að ég þýði fréttatilkynningar ESO svo þær birtast alltaf á sama tíma á íslensku og þær eru gerðar opinberar hjá ESO. Þetta er okkur mikil lyftistöng og viðurkenning á okkar starfi því ESO hleypir ekki hverjum sem er að hjá sér. Tilkynning þess efnis birtist á vef ESO í dag.

Fyrstu fjórar fréttatilkynningarnar eru þegar aðgengilegar á vef ESO. Sú nýjasta fjallar um ljósmyndina hér undir.

En hver er tilgangurinn með þessu öllu saman? Tilgangurinn er fyrst og síðast að auka umfjöllun íslenskra fjölmiðla um nýjustu niðurstöður rannsókna í stjarnvísindum. Þar sem allt efni er á íslensku ætti nú að vera auðveldara að birta fréttir af alheiminum á sama tíma og þær birtast í erlendum fjölmiðlum. Ég ætla að vona að íslenskir fjölmiðlar nýti sér það til hins ýtrasta. Á Stjörnufræðivefnum verður svo ítarefni sem tengist fréttunum.

Það er mér ljúft og skylt að minnast á þátt Ottós Elíassonar, eðlisfræðinema og nýjasta penna Stjörnufræðivefsins. Hann prófarkales allt efni sem birtist á íslenska ESO vefnum.

Já og meðan ég man, við erum komnir með nýtt lógó.

- Sævar Helgi Bragason

Athugasemdir

[Höskuldur Búi Jónsson, 13.8.2010 kl. 08:34]

Til hamingju með það - og fínt lógo.

[Arnar, 13.8.2010 kl. 09:50]

Flott framtak, íslenskir fjölmiðlar misstu td. algerlega af árlegu loftsteinadrífunni í nótt (man ekki hvað þetta heitir.. P eitthvað).  Fyrir utan að þessar fáu fréttir sem koma fram hjá þeim eru ótrúlega oft ekkert sérstaklega réttar.

[Inga Rún (IP-tala skráð) 13.8.2010 kl. 10:08]

Glæsilegt framtak. Það verður spennandi að fylgjast með hvort fleiri vísindafréttir verði birtar í íslenskum miðlum á næstu mánuðum.