Tilraunaglasið á Rás 1

Mér til mikillar ánægju heyrði ég nýjan vísindaþátt, Tilraunaglasið í umsjá Péturs Halldórssonar, á Rás 1 í dag. Í fyrsta þættinum fjallaði Pétur um íslenska rannsókn á húsasveppum, framleiðslu á eldsneyti úr dýrafitu og vísindauppgötvanir á yfirvegaðan og skemmtilegan hátt. Hægt er að hlusta á þáttinn á rúv.is en hann er líka endurfluttur á sunnudagskvöld klukkan 21:10. 

Það er mikill fengur í svona þætti og það gleður mig mikið að hann sé á Rás 1 því þá næst hann um allt land. Sem betur fer virðast fjölmiðlar, að minnsta kosti útvarpsmiðlar, farnir að sýna vísindum aðeins meiri áhuga en oft áður. Fyrir utan þennan nýja þátt er vikulega (á miðvikudagsmorgnum) stutt en laggóð umfjöllun um stjarnvísindi í Íslandi í bítið. Í Útvarpi Sögu er Vísindaþátturinn okkar alla þriðjudaga milli 17 og 18 og svo eru vikulegir pistlar um vísindi í Víðu og breiðu í umsjá Hönnu G. Sigurðardóttur (undirritaður er með pistil aðra hverja viku). 

Prentmiðlar mættu hins vegar alveg taka sig verulega á. Mánaðarleg umfjöllun um vísindi í prentmiðlunum eru teljandi á fingrum annarrar handar. Ekki einu sinni nýjasti prentmiðillinn, Fréttatíminn, hefur séð ástæðu til að birta vísindafréttir, sem mér þykir mjög dapurt. Ég sem hélt þeir vildu skera sig aðeins úr. En vonandi bæta prentmiðlarnir úr þessu.

- Sævar

Athugasemdir

[Loksins! (IP-tala skráð) 22.10.2010 kl. 15:27]

Loksins vísindatháttur sem ekki er í aesifréttastíl med djarflegaklaeddum tháttarstjórnendum sem spila thungarokk í tíma og ótíma. 

[Arnar Pálsson, 22.10.2010 kl. 17:13]

Pétur er með skemmtilegan og skýrann talanda.

Líklega hefur hann legið yfir textanum og vandað til verksins.

Hinn möguleikinn er að hann sé bara svona frábærlega gerður.

[Björn (IP-tala skráð) 23.10.2010 kl. 08:46]

Ég vona að fólk hafi ekki litið á Vísindaþáttinn á Útvarpi Sögu sem þátt "i aesifréttastíl med djarflegaklaeddum tháttarstjórnendum sem spila thungarokk í tíma og ótíma"!