Halló Vesta!

Næstkomandi laugardag, 16. júlí, kemst Dawn geimfar NASA á braut um smástirnið Vestu í smástirnabeltinu milli Mars og Júpíters. Ó hvað það verður gaman!

Dawn er að nálgast Vestu og smám saman verða drættir í landslaginu augljósari, eins og sjá má á  mynd sem tekin var 9. júlí síðastliðinn úr 41.000 km fjarlægð frá smástirninu:

Hér er horft undir Vestu, á suðurpólinn. Á myndinni sést stærsta kennileitið. Fyrir um einum milljarði ára rakst stærðarinnar hnöttur á Vestu með þeim afleiðingum að risavaxin dæld myndaðist á suðurhveli smástirnisins. Leifar af þessum árekstri þeyttist út í geiminn og hafa meðal annars fallið til jarðar sem svonefndir HED loftsteinar. Í miðju gígsins er stærðarinnar fjall sem rís 18 km yfir umhverfið í kring. 

Loftsteinarnir hafa gefið okkur góða ágæta hugmynd um Vestu þótt margt sé enn ólært. Í þeim eru steindir eins og ólivín og pýroxen sem við finnum í storkuberginu basalti. Það segir okkur að Vesta var eitt sinn bráðinn hnöttur og er líklega lagskiptur eins og jörðin því þungu efnin, málmarnir, sukku niður í átt til kjarnans en léttari efni þrýstust upp á við. Af þessum sökum er Vesta álitin leifar frumreikistjörnu. Vesta er ekki nema um 530 km í þvermál, ekkert svo ósvipað Íslandi að stærð.

Hægt er að lesa sér betur til um Vestu og Dawn á Stjörnufræðivefnum.

- Sævar

Athugasemdir

[Sverrir Gudmundsson (IP-tala skráð) 16.7.2011 kl. 12:54]

Meðlimur Stjörnuskoðunarfélagsins í Kanada keypti brot úr Vestu fyrir félagið um daginn. Við verðum með það til sýnist á Vísindavöku í haust og öðrum viðburðum í framtíðinni. Ekki slæmt að geta sýnt loftstein og hnöttinn þaðan sem hann kom!

Sverrir

[Sverrir Gudmundsson (IP-tala skráð) 16.7.2011 kl. 12:57]

Svo ég útskýri þetta betur: Loftsteinsbrotið sem félagið eignaðist á dögunum er af ákveðinni tegund loftsteina sem eru taldir eiga uppruna sinn að rekja til Vestu.