Versta veður í meira en hálfa öld

Í Atacamaeyðimörkinni í norðurhluta Chile — einum þurrasta stað jarðar — var líka einstaklega slæmt veður í um fimm daga í byrjun mánaðarins. Og það þykir saga til næsta bæjar á þessum slóðum. Eftir storminn var um 80 cm jafnfallinn snjór á stöðum þar sem úrkoma er alla jafna aðeins 1 til 3 millímetrar á ári. Ekki hefur snjóað svo mikið á þessum stað í meira en hálfa öld. Myndin hér undir var tekin með MODIS myndavélinni á Terra gervitungli NASA af snævi þaktri Atacamaeyðimörkinni.

Mynd: NASA/Terra-MODIS 

Stjörnustöð ESO í Paranal fór ekki varhluta af þessu óvenjulega veðri. Úrfelli og ofsaveður gerði á Paranal, þessu 2.400 metra háa fjalli sem venjulega býr við 340 heiðskíra daga á ári, svo stærstu sjónaukar jarðar voru ónothæfir í þrjár nætur. Allar bygginagar stóðu veðurofsan af sér en minniháttar tjón varð á hótelinu á staðnum, Residencia. 

Þessi mynd var tekin frá Residencia hótelinu á einum þurrasta stað veraldar í Atcamaeyðimörkinni í Chile. Úrfellið sem sést á myndinni er sárasjaldgæf sjón. Mynd: ESO/G. Lombardi

Regndropar á þurrasta stað jarðar. Mynd: ESO/G. Lombardi (ann11049)

Residencia er magnað hótel. Það er bókstaflega vin í eyðimörkinni og gengdi einmitt því hlutverki í James Bond myndinni Quantum of Solace. Þá var það griðarstaður illmennisins Dominic Greene.

Nokkru norðar á hinni 5000 metra háu Chajnantor sléttu við landamæri Chile og Bólivíu, þar sem APEX og ALMA sjónaukarnir eru staðsettir, snjóaði mikið. Engar skemmdir urðu en snjórinn hefur sett strik í reikninginn.

Tenglar

• European Southern Observatory (ESO) á Stjörnufræðivefnum
• Íslensk vefsíða ESO

- Sævar

Snjór veldur vandræðum í Síle

Athugasemdir

[Tómas Waagfjörð, 20.7.2011 kl. 01:34]

Hvernig er það þegar svona mikill snjór byrjar að bráðna á svona þurrum stað, er jarvegurinn of harður vegna þurkanna og nær ekki að gleypa bleytuna í sig og verða þá mikil flóð sem fara á svæðin fyrir neðan, sem sagt mun víðtækari áhrif en bara snjókoman?

[Stjörnufræðivefurinn (www.stjornufraedi.is), 20.7.2011 kl. 10:25]

Ég þekki það svo sem ekki en hef þó verið á svæðinu og veit að jarðvegurinn er nokkuð gljúpur. Hæg bráðnun ætti því auðveldlega að síga niður í jarðveginn að stórum hluta. Annars eru þarna líka árfarvegir sem vantið leitar eflaust í enda vatn mikilvirkasti rofmáttur eyðimarka þótt sjaldan rigni. Það verður fróðlegt að fylgjast með.