Loftsteinahrap séð utan úr geimnum - Hrós til Fréttablaðsins

Myndin hér undir er alveg mögnuð. Hún hefur reyndar birst á svo til öllum helstu stjörnufræðibloggum í heiminum og fellur klárlega í „geðveikt svalt“ flokkinn!

Myndina tók geimfarinn Ron Garan í Alþjóðlegu geimstöðinni. Hér sést líklega loftsteinn sem kallast Persíti. Persítar eru leifar af halastjörnunni Swift-Tuttle sem mynda loftsteinaregn 12. og 13. ágúst ár hvert. Þegar regnið stendur yfir sjást ef til vill um 60 loftsteinar á klukkustund. Loftsteinar brenna yfirleitt upp í um 100 km hæð yfir jörðinni, oft á sekúndubrotum, en geimstöðin er 250 km hærra. Það er því dálítið mergjuð tilviljun að geimfarinn skyldi ná mynd af stjörnuhrapinu.

Gervitungl verða annað slagið fyrir agnarsmáum loftsteinum sem skaða þau ekkert og sáralitlar líkur eru á að þau verði fyrir stærri steinum — sem betur fer. Geimurinn er stór og gervitunglin lítil.

---

Hvaða myndavélar eru geimfararnir að nota? Í geimstöðinni eru geimfararnir með ellefu Nikon D3s myndavélar og bestu Nikon linsur sem völ er á. 

---

Hrós dagsins fær Þorgils Jónsson blaðamaður hjá Fréttablaðinu. Í blaði dagsins er góð umfjöllun um næsta áfangastað Mars-jeppans Opportunity.

Í síðustu viku birtist grein eftir mig í Fréttablaðinu þar sem ég gagnrýndi litla og oft á tíðum dapra umfjöllun um vísindi. Vonandi hafði hún einhver áhrif svo að þetta sé það sem koma skal.

- Sævar

Athugasemdir

[Halldór Björgvin Jóhannsson, 16.8.2011 kl. 23:06]

Glæsileg mynd og flott framtak að fá aðeins fleiri fréttir í blöðin sem fjalla ekki um niðurgang hjá fræga fólkinu 8)

[Jón Ferdínand (IP-tala skráð) 19.8.2011 kl. 13:26]

Nákvæmlega, eina fréttasíðan á netinu sem hefur reglulegar vísindafréttir er mbl.is og sú síða hefur hlægilega lítið af þeim.

Við þurfum meiri fréttir af því sem mestu máli skiptir, þ.e. vísindin.