Hubble heldur áfram að gleðja

Hubble geimsjónaukinn heldur áfram að gleðja stjörnuáhugafólk. Fyrir skömmu tók Hubble mynd af mikilli stjörnumyndun sem á sér stað í þyrilvetrarbrautinni M83, Suðursvelgnum í stjörnumerkinu Vatnaskrímslinu. Myndin var tekin með nýjustu myndavél Hubbles, Wide Field Camera 3 (WFC3), sem komið var fyrir í sjónaukanum í maí síðastliðnum.

Fleiri myndir í stærri upplausn er að finna hér.

---

Júpíter á kvöldin, Síríus á morgnana

Einhverjir hafa velt fyrir sér hvaða björtu stjörnur sjást á suðurhimni á kvöldin og á morgnana. Kvöldstjarnan er gasrisinn Júpíter en morgunstjarnan er Síríus, bjartasta fastastjarna himins.

Ef þú átt handsjónauka, eða stjörnusjónauka, skaltu endilega beina sjónaukanum á Júpíter. Með handsjónauka sjást Galíleótunglin sem Galíleó Galílei uppgötvaði fyrir næstum 400 árum síðan. Með stjörnusjónauka getur þú séð skýjabelti í lofthjúpi gasrisans.

Færra markvert sést með því að beina sjónauka að Síríusi. Síríus er mjög heit stjarna í 8,7 ljósára fjarlægð frá sólinni og líka nokkru stærri en sólin okkar. Hún hefur fylgihnött, hvítan dverg sem fannst fyrir um einni og hálfri öld. Flestir taka eftir því að Síríus virðist skipta litum. Ástæðan fyrir því er einfaldlega ferðalag ljóssins í gegnum lofthjúp jarðar. 

Athugasemdir

[Kristinn Theódórsson, 6.11.2009 kl. 13:31]

Ég held bara áfram að kvitta hjá þér góði, hef engu við að bæta en finnst alltaf gaman að kíkja hér inn.

[Axel Jóhann Hallgrímsson, 6.11.2009 kl. 18:57]

Takk fyrir þetta

[Stjörnufræðivefurinn (www.stjornufraedi.is), 7.11.2009 kl. 12:35]

Takk fyrir að lesa og skoða það sem við setjum hingað inn!