Jarðsaga í Vísindaþættinum í dag

Í Vísindaþættinum í dag verður fjallað um sögu lífs og jarðar, reyndar með áherslu á jarðfræðina að þessu sinni. Í heimsókn kemur bloggvinur okkar, jarðfræðingurinn Ólafur Ingólfsson, sem svo vill til að er að kenna mér jarðsögu í Háskólanum á þessu misseri. Ólafur hefur stundað rannsóknir víða um heim, meðal annars í Suður Afríku, Botswana, Suðurheimskautinu og á Svalbarða.

Þátturinn er á dagskrá Útvarps Sögu milli klukkan 17 og 18 í dag, þriðjudag. Þátturinn verður svo aðgengilegur á Stjörnufræðivefnum innan nokkurra daga.

Athugasemdir

[Ágúst H Bjarnason, 15.9.2009 kl. 12:29]

Nú er bara að muna eftir að hlusta...   Það má hlusta á Sögu á netinu:

mms://apolLo.vortex.is/utvarpsaga

[Ágúst H Bjarnason, 15.9.2009 kl. 20:34]

Þátturinn var mjög áhugaverður.

Ég hlustaði á Ólaf fjalla um jarðsöguna síðastliðin 600 milljón ár í Odda fyrir fáeinum árum og hafði gagn og gaman af.

Ólafur mætti gjarnan gera meira af því að fræða okkur um jarðsöguna, breytingar á hitastigi, koltvísýringi o.fl. sem hann kom inn á í dag. Hann hefur það góða yfirsýn og reynslu að það er mikið mark takandi á því sem hann fjallar um. Hann talar auk þess "mannamál" sem allir skilja.

[Stjörnufræðivefurinn (www.stjornufraedi.is), 15.9.2009 kl. 20:49]

Er alveg sammála því. Mér fannst þetta mjög áhugavert alla vega, enda kannski ekki skrítið þar sem ég spurði þær spurningar sem mér þykja spennandi.

Ólafur mun koma aftur í þáttinn, það er alveg pottþétt. Á morgun verður þátturinn svo kominn inn á vefinn.

[Arnar Pálsson, 17.9.2009 kl. 08:54]

Frábært framtak, hlakka til að hlusta á þáttinn.

Hvaða skrítna frétt var þetta í Fréttablaðinu í dag, um gegnheila plánetu sem er samt bráðin?

[Stjörnufræðivefurinn (www.stjornufraedi.is), 17.9.2009 kl. 13:47]

Held að Fréttablaðið sé eitthvað að misskilja. Auðvitað fékk þessi annars merka uppgötvun nánast ekkert pláss í blaðinu. Slúðrið fær heilu opnurnar. Það var verið að tala um þetta hér, þ.e. uppgötvun evrópska stjörnufræðinga á fyrstu bergreikistjörnunni utan sólkerfisins. Ætli þeir hafi ekki þýtt "solid" sem gegnheil. Á yfirborðinu er bergið örugglega bráðið vegna nálægðinnar við sólstjörnuna.