Hvernig líta jörðin og tunglið út í sjónauka séð frá Mars?

Jörðin er ýmist kvöld eða morgunstjarna á Mars, rétt eins og Merkúríus og Venus á jörðinni. Frá Mars séð líkist jörðin mest Venusi þegar ástarstjarnan prýðir himininn frá jörðinni, björt og fögur fölblá stjarna. Sendiherrar jarðarbúa á Mars hafa ljósmyndað jörðina frá Mars, eins og sést á þessari mynd, sem Marsjeppinn Spirit tók:

Það væri gaman að vera geimfari með sjónauka á Mars og horfa til jarðar.

Það vita ef til vill ekki margir að á braut um Mars er mjög öflugur sjónauki sem heitir HiRISE um borð í Mars Reconnaissance Orbiter. Venjulega er þessum sjónauka reyndar beint niður á yfirborð reikistjörnunnar. Stundum er honum beint eitthvert annað eins og á reikistjörnur sólkerfisins.

Það var gert þann 3. október 2007.

Þessi glæsilega ljósmynd var tekin úr 142 milljón km fjarlægð frá jörðinni. Á myndinni sést vesturströnd Suður-Ameríku vel þótt skýin séu mest áberandi.

HiRISE hefur líka beint sjónum sínum að konungi reikistjarnanna, Júpíter. Þessi mynd var tekin 11. janúar 2007.

----

Nýjasti Vísindaþátturinn er kominn á vefinn.

Athugasemdir

[Kristinn Theódórsson, 14.10.2009 kl. 10:13]

Alltaf fyllist maður lotningu þegar maður spáir í þessar fjarlægðir og stærðir.

Myndin af jörðinni þarna númer tvö er geggjuð.

[Stjörnufræðivefurinn (www.stjornufraedi.is), 14.10.2009 kl. 18:01]

Algjörlega sammála því. Það eru til margar glæsilegar myndir af jörðinni úr geimnum. Einhvern veginn kemur smæðin alltaf vel í ljós á myndum eins og númer tvö.

[Arinbjörn Kúld, 14.10.2009 kl. 23:43]

Magnað, mann svimar við öllu þessu, nánast eins og heilinn í manni höndli ekki þessar stærðir allar.

Kveðja að norðan.

[Jóhann (IP-tala skráð) 15.10.2009 kl. 01:56]

Afar skemmtilegur sjónarhóll.

En er tilfellið ekki að fjarlægðir frá t.d. Júpíter til jarðar, eru sem píkómetrar deilt í með óræðri stærð?

Alltso miðað við þann sem rýnir í sjónaukann?

[Arnar, 15.10.2009 kl. 09:48]

Já, myndin af Jörðinni og Tunglinu er mögnuð.  Langaði að setja hana á desktop hjá mér en finn hana bara í 800x800 upplausn.  Vitiði hvort hún er til einhverstaðar í hærri upplausn?

[Stjörnufræðivefurinn (www.stjornufraedi.is), 15.10.2009 kl. 13:10]

Jú, fjarlægðir innan sólkerfisins eru dvergvaxnar við hliðina á fjarlægðum í Vetrarbrautinni og alheiminum.

Myndin af jörðinn og tunglinu er hér í betri upplausn (2000x2000). 

http://www.stjornuskodun.is/images/stories/pia10244.jpg

[Sveinn Atli Gunnarsson, 15.10.2009 kl. 15:17]

Það er alltaf fróðlegt að sjá það í samhengi hversu smá við erum í raun, samanber fyrsta myndin.