Fyrsta litmyndin frá Curiosity

Við sögðum frá því í gær að fyrsta litmyndin frá Curiosity væri væntanleg frá MAHLI smásjármyndavélinni í jeppanum. Hér er hún komin:

Myndin er fremur óskýr vegna þess að hún er tekin í gegnum gegnsætt hlífðarlok á myndavélinni. Ekki veitti af því að hafa þessi lok á myndavélum jeppans, því mikið ryk þyrlaðist upp við lendinguna sem settist á lokin. Myndinni hefur verið snúið 30 gráður miðað við skrokk jeppans því ekki er búið að reisa við arminn sem hún er á. Horft er að gígbarminum sem er í 28 km fjarlægð frá jeppanum.

MAHLI eða Mars Hand Lens Imager er smásjá eða eiginlega lúpa, eitt mikilvægasta tæki jarðfræðingsins, á Mars. Með lúpunni fáum við nærmyndir í hárri upplausn af bergi og jarðvegi í feltinu. 

Í gær voru einnig birtar myndir frá MARDI myndavélinni sem er undir jeppanum en hún tók myndir þegar jeppinn kom inn til lendingar. Sú vél tók 4,5 ramma á sekúndu í háskerpu eða með 1600x1200 pixla upplausn. Við fáum að sjá myndirnar í fullri upplausn innan tíðar en látum okkur nægja eitt skot á meðan sem sýnir hitaskjöldinn falla burt. Hann er í um 15 metra fjarlægð þegar þessi mynd var tekin.

Mynd: NASA/JPL-Caltech/MSSS

Þetta skot sýnir svo rykið þyrlast upp þegar jeppinn hékk í krananum í um 20 metra hæð.

Mynd: NASA/JPL-Caltech/MSSS

Í nótt var unnið að því að ræsa jeppann, kveikja á fjarskiptatækjunum og fleira. Fyrsta panoramamyndin er væntanleg eftir fáeina daga.

- Sævar Helgi 

Fyrsti dagur Curiosity á Mars - stórkostleg mynd af lendingunni

Uppfært kl. 23:15 - Sólin er að rísa yfir lendingarstaðnum þegar þetta er skrifað. Í nótt verður jeppanum gert að stilla loftnetin sem á honum eru og koma á sambandi við jörðina. Jeppinn er í 6 km fjarlægð frá Sharpfjalli og rúma 20 km frá gígbarminum. 

Birtar hafa verið myndir frá MARDI myndavélinni, sem tók myndir þegar jeppinn kom inn til lendingar. Myndunum hefur verið skeytt saman í myndskeiðið hér undir (það verður miklu betra síðar þegar við sjáum það í fullri upplausn):

- - - 

Eftir velheppnaða lendingu Curiosity í morgun hafa fyrstu myndirnar frá jeppanum verið að berast ein af annarri í dag. Þessar myndir koma ekki frá aðalmyndavélum jeppans heldur Hazcam vélunum sem eru undir honum.

Þessi mynd er tekin í átt að fjallinu í miðju gígsins sem kallast Sharp. Sharpfjall verður eitt helsta rannsóknarefni Curiosity þegar líða tekur á leiðangurinn. Dökka svæðið við sjóndeildarhringinn er sandöldusvæði i nokkurra km fjarlægð frá lendingarstaðnum.

Sandöldusvæðið gæti orðið einhver fyrirstaða en það er fremur mjótt. Farið verður auðveldustu leiðina í gegnum sandöldurnar, en lítist mönnum ekki á blikuna verður haldið norður fyrir hana og suður aftur í átt að fjallinu. Ágæt leið til að gera sér grein fyrir sandöldusvæðinu og fjallinu er að skoða þessa tölvugerðu mynd en jeppinn er við ljósu aurkeiluna á myndinni:

Augnakonfekt frá Mars Reconnaissance Orbiter

Stórkostlegasta mynd dagsins kom hins vegar frá Mars Reconnaissance Orbiter:

Mynd: NASA/JPL/University of Arizona

Þessi magnaða mynd var tekin einni mínútu fyrir lendingu úr 340 km fjarlægð (það er svipað og að sjá Yaris bifreið í fallhlíf yfir Öxnadal frá Reykjavík). Á henni sjást smáatriði í fallhlífinni, sem er 16 metra breið og 50 metra löng og opnaðist á tvöföldum hljóðhraða.

Neðar sést hitaskjöldurinn

Mynd: NASA/JPL/University of Arizona

Samskonar mynd var tekin af lendingu Phoenix á Mars árið 2008.

Á myndinni hér undir sést afstaða geimfaranna þegar myndin var tekin.

Eftir lendingu var eldflaugakrananum gert að fljúga burt í norðurátt, frá fyrirhuguðu rannsóknarsvæði. Um borð voru í heild 400 kg af eldsneyti en 140 kg voru eftir þegar jeppinn var lentur.

Ekki liggur fyrir hvar hann brotlenti fyrr en HiRISE tekur mynda af svæðinu á næstu dögum. Ekki liggur heldur fyrir hvort Curiosity muni aka að brakinu.

Næstu dagar fara í að ræsa tækin á jeppanum og mastrið reist við. Þá munu fyrstu litmyndirnar væntanlega berast, líklega fyrst frá MAHLI myndavélinni sem tekur smásjármyndir í lit af jarðveginum.

Við leiðangurinn starfa 400 vísindamenn og yfir 300 verkfræðingar víðsvegar að úr heiminum. Þeir munu fyrstu þrjá mánuðina lifa á Marstíma en sólarhringurinn á Mars er 40 mínútum lengri en á jörðinni. Eftir það halda þeir til sinna stofnana og vinna að rannsóknum þaðan.

Allir 400 vísindamennirnir munu vilja stoppa á 400 mismunandi stöðum. Þess vegna munu fyrstu ökuferðirnar ganga mjög hægt fyrir sig. Eftir tæpt ár eða svo verður jeppinn væntanlega komin að rótum Sharpfjalls.

Jeppinn á að endast í að minnsta kosti tvö ár en miðað við reynslu okkar af fyrirrennurunum Spirit og Opportunity, kæmi engum á óvart ef hann entist að minnsta kosti tvöfalt lengur. Opportunity er enn að störfum, átta árum eftir lendingu.

Þegar þetta er skrifað kl. 21:30 að kvöldi 6. ágúst verður næsti fréttamannafundur eftir rúma klukkustund. Þá birtast nýjar myndir sem við munum birta á Facebook síðu okkar og kannski uppfæra bloggið líka.

Stay tuned!

Og nú byrjar ballið!

 

- Sævar Helgi

Curiosity lentur - Velkomin til Mars!

Uppfært kl. 16:11 - Vá! Þessa stórkostlegu mynd tók Mars Reconnaissance Orbiter af Curiosity koma inn til lendingar:

Mynd: NASA/JPL/University of Arizona

- - - 

Curiosity jeppinn lenti heilu og höldnu á yfirborði Mars klukkan 05:40:39 að íslenskum tíma í morgun eftir 563 milljón km ferðalag. Á sjö mínútum hægði hann ferðina úr 5 km/s niður í 0,04 metra á sekúndu!

Það er svipað og að hægja för bíls úr 100 km hraða á klukkustund niður í 0 m/s á rúmum tveimur sekúndum!

Fyrstu myndirnar sem bárust voru litlar, svarthvítar víðmyndir frá Hazcam myndavélunum, sem eru undir jeppanum, í gegnum hlíf sem varði linsurnar fyrir ryki sem þyrlaðist upp (dökku deplarnir eru rykagnir): 

Curiosity á Mars! 

Eins og sjá má eru engar sandöldur framundan sem þýðir að fyrsta ökuferðin verður „auðveld“. Jeppinn mun mest ná 4 cm hraða á sekúndu en líklegt að hraðinn verði alla jafna helmingi minni.  

Gögnin streymdu frá Mars Odyssey geimfari NASA sem er á sveimi um Mars. Fljótlega eftir lendingu var geimfarið komið úr kallfæri við Curiosity en ný gögn munu berast eftir rúma klukkustund þegar þetta er skrifað.

Jeppinn fer í gegnum prófanir á næstu dögum og byrjar svo að aka um yfirborðið. Ekki verður anað að neinu. Eftir tæptl ár eða svo verður jeppinn við rætur Sharpfjalls. Það er nefnilega margt áhugavert að sjá á leiðinni þangað.

Ég mun uppfæra bloggið og væntanlega Stjörnufræðivefinn þegar nýjar fréttir berast

Þetta er stórkostlegt afrek!

Velkomin til Mars!

- - - -

Uppfært kl. 08:12 - Nýjustu myndirnar bárust frá Mars Odyssey rétt í þessu og sýna meðal annars barm Gale gígsins í fjarska. Næsti fréttamannafundur verður haldinn klukkan 16:00 í dag þegar fólkið í Kaliforníu er búið að sofa örlítið.  Meira þá!

Curiosity á Mars. Í fjarska sést barmur Gale gígsins

Curiosity lendir í nótt!

Í nótt lendir Curiosity jeppinn á Mars eftir tæplega níu mánaða ferðalag. Jeppinn er jarðfræðingur á hjólum, útbúinn fullkomnum tækjum til efnagreininga. Á honum eru 17 myndavélar, þar á meðal háskerpuvélar en með þeim gætum við fengið að sjá fyrstu háskerpumyndskeiðin frá Mars í þrívídd.

Með þessum tækjum á jeppinn að finna út hvort Gale gígurinn var einhvern tímann lífvænlegur. 

Lendingin

Við höfum áður lýst öllum helstu stigum lendingarinnar hér. Ferlið hefst klukkan 05:14 í nótt og er sem hér segir (allt að íslenskum tíma):

• 05:14:34 - Siglingastig losnar
• 05:24:34 - Hemlun hefst þegar geimfarið snertir lofthjúp Mars
• 05:28:46 - Fallhlífin opnast við næstum 10g þyngdarhröðun
• 05:29:07 - Hitaskjöldur losnar
• 05:30:40 - Bakhlífin losnar og eldflaugakraninn er ræstur
• 05:31:17 - Curiosity sígur niður úr eldflaugakrananum
• 05:31:37 - Curiosity snertir yfirborð Mars!

Á meðan þessu stendur er jörðin að setjast frá Gale gígnum séð og utan kallfæris, ef svo má segja. Þau þrjú gervitungl sem eru á sveimi um Mars — bandarísku gervitunglin Mars Odyssey og Mars Reconnaissance Orbiter (MRO) og hið evrópska Mars Express — munu þess í stað hlusta eftir merkjum frá Curiosity og beina til jarðar. Mars Odyssey streymir beint frá Mars en MRO mun afkóða merkin og senda þau síðan til jarðar. Það síðarnefnda tekur mun lengri tíma.

Mars er 248 milljón km frá jörðinni þegar lendingin á sér stað. Þess vegna verða öll merki næstum 14 mínútur að berast til jarðar.

Gale-gígurinn

Lendingarstaður Curiosity er 155 km breiður gígur rétt sunnan við miðbaug Mars. Hann er á mörkum gígótta suðurhálendisins og láglendis Elysium eldfjallasléttunnar og er áætlaður milli 3,5 og 3,8 milljarða ára gamall. Gígurinn er misdjúpur en mest 4.674 metrar undir hæsta punkti. Curiosity lendir í –4,4 km hæð.

Gale gígurinn á mynd Mars Express geimfars ESA. Litirnir tákna mismunandi hæð og er blátt lægst en hvítt hæst. Curiosity lendir á fjólubláa svæðinu vinstra megin á myndinni fyrir miðju. Mynd: SA/DLR/FU Berlin (G. Neukum)

Gígurinn er mjög áhugaverður jarðfræðilega. Í miðju hans er sex kílómetra hátt lagskipt sigðarlaga fjall eða bunga, mun yngra en gígurinn sjálfur. Fjallið nefnist Sharpfjall og hefur hlaðist upp við mismunandi aðstæður í sögu Mars fyrir tilverknað vatns og vinda og mun gera okkur kleift að lesa sögu loftslags og veðrunar á reikistjörnunni. Svo virðist sem gígurinn hafi fyllst af seti sem síðan hefur fokið burt að hluta og skilið eftir fjallið í miðjunni.

Ofan í og í kringum gíginn eru mörg ummerki rennandi vatns í fyrndinni, svo sem árfarvegir, gljúfur og aurkeilur en Curiosity mun einmitt lenda á einni slíkri.

Lendingarstaður Curiosity á aurkeilu í Gale gígnum. Gangi allt að óskum mun jeppinn aka upp á ljósleita svæðinu. Mynd úr Anderson og Bell III, Mars 5, 76-128, 2010

Gervitunglin á braut um Mars hafa þegar fundist vatnaðar steindir og leir. Nontrónít er ein þeirra steinda sem fundist hafa en hún bendir til þess að vatnið í gígnum hafi haft tiltölulega lágt sýrustig sem er mikilvægt fyrir lífvænleika staðarins og varðveislu á ummerkjum um líf.

Á gígbotninum hafa fundist basískar steindir eins og ólivín og pýroxen í sandöldunum. Það kemur ekki á óvart, enda stutt í stóru eldfjöllin fyrir norðan gíginn.

Í nótt og á morgun

Undirritaður mun fylgjast með lendingunni í beinni útsendingu af vef NASA frá klukkan fjögur í nótt eða svo og nota Twitter til að lýsa því helsta sem gerist (@stjornuskodun).

Eftir lendingu hefst fréttamannafundur klukkan 06:15 að íslenskum tíma og umfjöllun heldur áfram um morgunin.

Ég mun uppfæra bloggið eftir því sem við á og birta fyrstu myndirnar á Stjörnufræðivefnum þegar þær berast. Það gæti verið strax um morguninn eða síðar um daginn.

Tenglar

• Curiosity á Stjörnufræðivefnum
• Curiosity á vef NASA/JPL
• Bein útsending af vef NASA/JPL

- Sævar Helgi

Hvernig lendir maður kjarnorkuknúnum jeppa á annarri reikistjörnu?

Tölvuteiknuð mynd af Curiosity við jarðfræðirannsóknir á Mars. Mynd: NASA

Nú eru rétt rúmir fimm dagar þar til Curiosity jeppinn lendir á yfirborði Mars. Hann er stærsta og fullkomnasta geimfar sem sent hefur verið til reikistjörnunnar hingað til. Hann er á stærð við lítinn fólksbíl á borð við Yaris og vegur eitt tonn. Öfugt við Yaris gengur hann ekki fyrir olíu heldur kjarnorku.

Lendingin lítur brjálæðislega út og tekur í heild sjö skelfilegar mínútur. Á sjö mínútum þarf að hægja á ferð hans úr rúmlega 20.000 km hraða á klukkustund niður í innan við einn metra á sekúndu. Hver einasta sekúnda er fyrirfram ákveðin og er stjórnað af tölvu um borð.

Ef eitthvað eitt klikkar er úti um jeppann. Vegna þess hve langt í burtu Mars er frá jörðinni eru merki 14 mínútur að berast á milli. Þegar við á jörðinni fáum merki um að lendingin sé hafin hefur jeppinn í raun verið lifandi eða dauður á yfirborðinu í sjö mínútur.

Jeppinn er innan í tvískiptri hlífðarskel. Þegar hann rekst á lofthjúpinn hitnar hitaskjöldurinn, sá stærsti sem notaður hefur verið í geimferð, svo hann verður álíka heitur og glóandi hraun.

Á örfáum mínútum hægir núningurinn við lofthjúp Mars á farinu en á sama tíma er verið að fljúga því eins og flugvél en það hefur aldrei verið gert áður á Mars.

Lofthjúpur Mars er 100 sinnum þynnri en lofthjúpur jarðar svo þar er ekki nægilega mikið loft til að hægja nóg á jeppanum.

Þess vegna þarf líka að nota stóra og sterkbyggða fallhlíf sem þarf að þola gífurlegt álag. Þegar fallhlífin opnast fellur hitaskjöldurinn burt og jeppinn kemur í ljós. Undir honum er ratsjá sem mælir hæð og veitir tölvunni upplýsingar sem tryggja (vonandi) örugga lendingu.

Fallhlífin ein og sér dugir heldur ekki til. Þess vegna er jeppinn látinn falla úr hlífðarskelinni. Ofan á honum er eldflaugaeining sem er ræst og sér um rest.

Eldflaugaeiningin stýrir jeppanum að lendingarstaðnum sem er ofan í djúpum gíg, skammt frá 6 km háu fjalli.

Ekki er hægt að lenda með eldflaugarnar í gangi því þær þyrla upp ryki sem gæti laskað tækin um borð.

Rúmum tuttugu metrum fyrir ofan yfirborðið breytist eldflaugaeiningin í krana sem slakar jeppanum niður. Síðan er klippt á naflastrenginn og eldflaugakraninn flýgur burt. 

Þetta er í fyrsta sinn sem lent er á Mars með þessum hætti. Curiosity er of stór til að hægt sé að lenda honum með loftpúðum eins og fyrirrennurum hans Spirit og Opportunity og Pathfinder.

Jeppinn lendir á Mars klukkan 05:31 að íslenskum tíma. Undirritaður er vægast sagt spenntur!

Hægt er að lesa sér betur til í ítarlegri grein um jeppann á Stjörnufræðivefnum http://www.stjornufraedi.is/curiosity Við munum svo fjalla betur um lendingarstaðinn og jeppann sjálfan á næstu dögum.

- Sævar Helgi

Fyrirlestur um halastjörnur mánudagskvöldið 2. júlí kl. 20:30

Halastjarnan Tempel 1 og Deep Impact í júlí 2005. Mynd: NASA

Mánudagskvöldið 2. júlí 2012 verður boðið upp á fræðslukvöld fyrir almenning í tilefni sumarskóla í stjörnulíffræði sem fram fer á Íslandi 2. til 15 júlí. Þá flytur Karen Meech fyrirlestur um nýjar niðurstöður rannsókna tveggja gervitungla á halastjörnum og hvað þær hafa að segja um uppruna vatns á jörðinni. Erindið fer fram í salnum Gullteigur á Grand Hótel í Reykjavík. Aðgangur er ókeypis og eru allir velkomnir.

• Hvar: Grand Hótel í Reykjavík, salurinn Gullteigur

• Hvenær: Mánudagskvöldið 2. júlí 2012 kl. 20:30

Evklíð kannar hulduefni og hulduorku

Í gær gaf ESA, Geimvísindastofnun Evrópu (sem Ísland á því miður ekki (enn) aðild að), grænt ljós á smíði Evklíðs (hægri). Evklíð er geimsjónauki sem á að kanna þau 96% alheimsins sem við vitum lítið sem ekkert um, nefnilega hulduefni og hulduorku. Honum verður skotið á loft árið 2019-2020.

Hulduefni er dularfullt efni sem víxlverkar ekki við venjulegt efni og gefur ekki frá sér ljós en kemur upp um tilvist sína með þeim þyngdaráhrifum sem það hefur á umhverfi sitt á stórum skala. Til dæmis heldur það vetrarbrautum saman og sveigir ljós. Þótt við sjáum það ekki, sjást áhrif þess á umhverfið. Þannig vitum við að það er til — hvað svo sem það er.

Hulduorka er enn dularfyllri. Hún uppgötvaðist árið 1998 og veldur sívaxandi útþensluhraða alheimsins. Fyrir þessa uppgötvun voru veitt Nóbelsverðlaunin í eðlisfræði árið 2011. Við höfum ekki hugmynd um hvað þetta skrítna fyrirbæri er.

Og þess vegna er nokkurt kapphlaup um að varpa ljósi á þessi fyrirbæri. Vegna niðurskurðar í Bandaríkjunum er ekki líklegt að NASA sendi á loft sinn eigin sjónauka til að rannsaka fyrirbæri á næstunni, bandarískum stjörnufræðingum til nokkurrar gremju.

Þess vegna tökum við Evklíð fagnandi!

Evklíð verður útbúinn 1,2 metra sjónauka og tveimur mælitækjum, myndavél og innrauðum litrófsrita og mun NASA útvega innrauða ljósnema fyrir það síðarnefnda. Nærri þúsund vísindamenn, aðallega evrópskir, frá 100 stofnunum mynda svo Evklíð samstarfið sem sér um að smíða tækin og vinna úr gögnum þess.

Evklíð mun kortleggja þrívíða dreifingu hulduefnis í kringum allt að tvo milljarða vetrarbrauta, á svæði sem nær yfir einn þriðja af allri himinhvelfingunni. Í leiðinni skyggnist hann um tíu milljarða ára aftur í tímann, eða sem nemur þremur fjórðu af sögu hans. Það gerir mönnum kleift að draga upp mynd af þróun vetrarbrauta í alheiminum og útþenslunni.

Evklíð er annar af tveimur meðalstórum leiðangrum sem ESA hefur þegar valið í Cosmic Vision áætlun sinni. Hinn leiðangurinn er ekki síður spennandi, sólkönnunarfarið Solar Orbiter.

Solar Orbiter verður skotið á loft árið 2017. Það mun fljúga í innan við 45 milljón km fjarlægð frá sólinni, nær henni en Merkúríus, ljósmynda pólsvæði hennar í fyrsta sinn sem mun hjálpa okkur að skilja hvernig segulsvið sólar verður til. Bættur skilningur á segulsviði sólar hjálpar okkur að skilja þá sólvirkni sem veldur norðurljósunum og getur laskað gervitungl.

Óneitanlega spennandi tímar framundan hjá ESA! Evklíð, Solar Orbiter og JUICE á dagskrá. Og ekki nóg með það þá er ESA að vinna að hönnun næstu kynslóðar Mars jeppa.

- Sævar Helgi

Gullfalleg mynd af einu dularfyllsta tungli sólkerfisins

Mynd: NASA / JPL / SSI / Emily Lakdawalla

Sá þessa gullfallegu mynd á bloggi Emily Lakdawalla hjá Planetary Society. Mér finnst hún svo falleg að ég bara varð að deila henni með ykkur. 

Þetta er tunglið Títan, stærsta tungl Satúrnusar og næst stærsta tungl sólkerfisins og eina tunglið í sólkerfinu sem hefur þykkan lofthjúp. Á yfirborðinu er 180 stiga frost. Þar rignir metani sem safnast saman í læki, ár og stöðuvötn — til dæmis heitir eitt þeirra Mývatn. 

Þessa mynd tók Cassini geimfar NASA þann 6. júní síðastliðinn. Þegar myndin var tekin var sólin á bak við Títan. Við sjáum sólarljósið umlykja hnöttin. Þarna horfum við á öll sólsetur og sólarupprásir á Títan í einu. Neðst á myndinni sést lítil íshetta á suðurpóli Títans.

Mikið búum við í fallegum alheimi — og þvílík forréttindi að fá að njóta fegurðinnar!

- Sævar Helgi

Hve stór væri sólin séð frá öðrum reikistjörnum?

Mynd: SDO  (Smelltu tvisvar til að stækka myndina)

Myndin hér að ofan hefur sést víða á Facebook síðustu daga. Hún sýnir sýndarstærð sólar á himninum séð frá öðrum reikistjörnum sólkerfisins.

Býsna sláandi ekki satt?

Reyndar er eitt dálítið villandi við myndina: Vegna birtu sólar finnst manni hún stærri á himninum en hún er í raun og veru. Þetta sést vel ef þú skoðar sólina í gegnum myrkvagleraugu. Það kemur mörgum á óvart hversu lítil sólin er.

Stærð hennar á himninum er jú bara svipuð og tunglsins. Þess vegna geta orðið almyrkvar á sólu.

Smæð sólar hefur áhrif á birtuskilyrðin á reikistjörnum. Á Mars er fellur tæplega helmingi minna sólarljós en á jörðina. Á Júpíter fellur ekki nema 3,4% af birtunni sem fellur á jörðina. Þess vegna er ekki hagkvæmt að senda þangað sólarorkuknúin geimför (þótt fyrsta sé lagt af stað).

Á Neptúnusi er birta sólar ekki nema 0,1% af birtunni frá jörðu séð. Þar er álíka bjart á hádegi og við rökkur á jörðinni.

Á Plútó væri sólin 1500 sinnum daufari en á jörðinni en samt allt að 450 sinnum bjartari en fullt tungl! Þar er líka nístingskuldi, yfir 200 gráðu frost.

- - - 

Gammablossar í Tilraunaglasinu

Páll Jakobsson stjarneðlisfræðingur var gestur Tilraunaglassins á Rás 1 í dag. Páll fékk nýverið hvatningarverðlaun vísinda- og tækniráðs og talaði um viðfangsefni sitt í stjarnvísindum, gammablossa, orkuríkustu sprengingar alheimsins.

- Sævar

Komdu og skoðaðu sólina 17. júní

Venus gengur fyrir sólu 5. júní 2012. Mynd: Adam Thor Murtomaa

Ef veður leyfir þjóðhátíðardaginn 17. júní næstkomandi gefst þér kostur á að skoða sólina á öruggan hátt undir leiðsögn stjörnuáhugafólks víða um land.

Félagsmenn í Stjörnuskoðunarfélagi Seltjarnarness munu setja upp sólarsjónauka á Austurvelli frá klukkan 14:00 til 17:00 og sýna áhugasömum sólbletti og sólgos, ásamt því að fræða fólk um undur sólarinnar.

Á Akureyri býður Stjörnu-Odda félagið upp á sólskoðun við Menntaskólann á Akureyri, við Möðruvelli nánar tiltekið, frá klukkan 13:00.

Í Vestmannaeyjum munu félagsmenn í Stjörnufræðifélagi Vestmannaeyja einnig bjóða upp á sólskoðun.

Og að lokum verður hægt að skoða sólina á Þingeyri undir dyggri stjórn Jóns Sigurðssonar, stjörnuáhugamanns. 

Þá er bara að vona að veðrið verði hagstætt og að sú gula láti sjá sig.

- Sævar Helgi