Sögðum frá þessu í gær - nánar um blossann

Við sögðum einmitt frá þessum blossa í gær, eins og áhorfendur Kastljóssins tóku vonandi eftir. Vert er að taka fram að engin hætta er á ferðum.

Sólin er misvirk. Hún hefur verið óvenju óvirk undanfarin ár, raunar svo óvirk að menn voru hættir að botna í sólinni (menn hafa reyndar aldrei botnað neitt alltof vel í sólinni en það horfir til bóta). Á ellefu ára fresti eða svo nær virknin hámarki og eru þá sólblettir og sólblossar algengir. Í gær sögðum við frá vægum M-blossa frá sólblettahópi 1158 sem þeytti nokkru efni í átt til jarðar og olli fínum norðurljósum í gærkvöldi og í nótt. Jón Sigurðsson, okkar maður á Þingeyri, náði myndum af sólblettahópnum með sjónaukanum sínum og birti á blogginu sínu.

Nú hefur sterkasti sólblossi í meira en fjögur ár orðið í þessum sama sólblettahópi. Blossinn náði hámarki klukkan 01:56 að íslenskum tíma og mældist X2 á styrkleikakvarða sólblossa. X-blossar eru öflugustu blossarnir (sjá nánar hér um styrkleika blossa) og er þetta fyrsti X-blossinn í nýju sólblettasveiflunni (nr. 24) sem nær líklega hámarki í kringum 2013. Við eigum von á fleiri X-blossum á næstu árum með tilheyrandi norðurljósasýningum.

Með þessum blossa barst kórónuskvetta frá sólinni sem stefnir nú í átt að jörðinni. Búast má við fallegum norðurljósum í nótt og næstu nætur og segulstormi þegar efnið kemur til okkar. 

Hér undir er mynd af blossanum.

Þessar myndir voru teknar með Solar Dynamics Observatory geimfari NASA. Skvettan sem stefnir nú til okkar sést vel á þessari mynd Stereo geimfarsins.

Ef veður leyfir ættu því áhugamenn um norðurljósaljósmyndun að kíkja út í kvöld og annað kvöld. Ef kraginn sem sést hér undir er rauður, horfðu þá til himins!

===

Megum til með að vísa líka á eftirfarandi:

• Stardust flýgur framhjá halastjörnunni Tempel 1
• Fögur endurskinsþoka
  

- Sævar

Sólstormur í vændum

Athugasemdir

[Sigurjón Valgeir (IP-tala skráð) 17.2.2011 kl. 02:11]

Ég er að velta fyrir mér hvort solar wind mælirinn á spaceweather.com sé eitthvað laskaður eftir atburði síðustu daga? Í nánast allan dag hefur hann litið svona út:

Solar wind
speed: 378.5 km/sec
density: 0.0 protons/cm³

Mér finnst eins og oft þó lítið eða ekkert sé að gerast fyrir ofan kollinn á okkur, þá sýni density meira en 0,0 róteindir/cm³

Eftir að hann sýndi vel yfir 10-15 protons/cm³ í nokkrar klukkustundir, þá hefur hann eiginlega bara farið niður á við og stendur ansi fastur í núllinu!

[Stjörnufræðivefurinn (www.stjornufraedi.is), 17.2.2011 kl. 12:08]

Það hefur verið ótrúleg ládeyða miðað við hversu öflugir blossarnir hafa verið. Það hefur dregið úr líkum á segulstormi en samt eru ágætar líkur enn á fínum norðurljósum í kvöld og næstu nætur.

Ef þéttleikinn er svona líitill er bara lítið sem ekkert um sólvind í nágrenni jarðar. Þetta er mælt með ACE gervitunglinu sem er milli jarðar og sólar.

En hver veit, kannski er þetta bara lognið á undan storminum. Fylgjumst bara vel með.